வித்யாசாகரின் எழுத்துப் பயணம்..

1
உனக்கென்ன
வனம் கேள் வானம் கேள்
கடல் கேள் காதல் கேள்
மண் கேள்
மலையும் ஒரு காட்டையும் கூட கேளேன்..

எதுவாயினும் உனக்காகக்
கொண்டுவருவேன்;
நீ உனது சின்ன சிரிப்பை தா போதும்!!
—————————————————–

2
அதென்ன மல்லிகை முற்றமும்
அதன் அருகே நிலாவும்
கூட நீயும்.. ?

எனக்கு நீ
உனதருகில் மல்லிகை முற்றம்
நம்மோடு நிலா

ஏன்னா
மீதி எல்லாம் வரும் போகும்
போகும் வரும்,

நீ வருவாய்
வருவாய்
போகமாட்டாய்..
—————————————————–

3
உனக்குதான்
பேச்சிலென்ன தேன் குழைந்திருக்கோ ?

உனக்கு தான்
காற்றில் சிறகுகள் வீசி பறக்கத்
தெரிகிறதோ?

உனக்கு தான்
தேவதையின் சிரிப்பழகும்
மலர்களின் மெல்லழகும்
கூடுதலோ..

காணுமிடமெலாம்
என் கண்களுக்கு நீயே தெரியுமந்த
வித்தை கூட
உனக்கே தெரிந்திருக்கிறது..

உண்மைதானே
இப்போதெல்லாம் எனக்கு சிரிப்பும்
அழையும் கூட ஒன்றாகவே தெரிகிறது
இரண்டிலும் நீயே இருப்பதால்..
—————————————————–

4
பள்ளிக்கூடம்
போகையிலும் சரி

கல்லூரி காலமும் சரி

அலுவல் சென்றாலும் சரி

எங்கே எதன் பொருட்டு நான்
உயிர்த்திருந்தாலும் சரி

உனை நினைத்திருக்கிறேன்
என்பதே உண்மை..
—————————————————–

5
எது உனக்கு பிடிக்குமோ
அதை உனக்கு தர விரும்புகிறேன்,

எதில் நீ
நிறைவாயோ
அதையே தர விரும்புகிறேன்,

எதில் உனக்கு மகிழ்வோ
அதையே தரத் தான்
தவிக்கிறேன்

அது பிரிவாயினும் சரி
அது உயிராயினும் சரி
உனை மறப்பதாயினும் கூட..
—————————————————–
வித்யாசாகர்

நாவினால் தொட்டாலும் இனிக்கும்
தொடாது பார்த்தாலும் அழகு சொலிக்கும்
அண்டம் பேரன்டமென ஆராய்ந்துப் பார்த்தால்
அங்கே மூத்த நரைகொண்டு ஒரு சொல்லேனும்
தமிழில் அமர்ந்திருக்கும், அத்தகு தாய்மொழி தமிழுக்கு என் முதல்வணக்கம்..

அசோக சக்ரவர்த்தி யென்ன
அத்தனைப் பெரிய வீரரா? ஆமெனில் வந்து எமது
அசோக் கவிஞரிடம் தமிழ்பாடி வெல்லட்டும்
ஒரு கவி பாடி ஓயட்டும்,

சற்றும் சாயாது வாழும் தமிழை
சொல்லாலே முத்தமிடும் அருங் கவிஞர்
தமிழ் பாவாலே எமையழைக்க
நாவழகு கொண்ட நற்றமிழ் தொண்டர்
தலைவர், திரு. அசோக் அவர்களுக்கு பேரன்பு வணக்கம்!

எமது தீந்தமிழ் சொல்லெடுத்து
தேரழகு பூட்டியொரு
பா வகையை பயிற்றுத் தந்த
எம் அருந்தமிழ் பெரியோர்களுக்கு வணக்கம்..

இடையிடையே வந்து
தாகத்திற்கு நீரருந்தும் வானம்பாடியை போல
ஏக்கம் கூடுகையில் வந்திங்கு பாட்டருந்தி போகிறேன்
உங்களின் சொற்களை மிகுந்த சிநேகத்தோடு காண்கிறேன்
நலம் நலமறியும் ஆவலை காண்பித்துக் கொள்ளாமலே
உங்களில் ஒருவராகவே வாழ்கிறேன், கருத்திடாமைக்கும், சொல்லிடாத வணக்கத்திற்கும் மன்னித்து அன்பை மட்டுமே ஏற்பீர்களாக..

அன்புடையோர் அனைவருக்கும், நட்புள்ளம் கொண்ட சினேகவெளியில்
கவிதை கடலாக தனித்திருக்கும்
எனதன்பு படைப்பாளிகளுக்கு தீரா பாசம் மிகு மதிப்பான வணக்கம்!!

இதோ “சித்திரக்கவிதை” கவியரங்கத்தில் பகிர்ந்துக்கொண்டது..

நன்றியுடன்..

வித்யாசாகர்