வித்யாசாகரின் எழுத்துப் பயணம்..

போர் போரென
கதறிய கத்திய
அவலகுரலில்;
செவிடாகிப் போயினர்
உலகத்தினர்,
ஊமையாகிப் போயினர்
தமிழர்கள்!
———————————————

ஆணும் பெண்ணும்
குழந்தையுமென –
கொன்று குவித்தவனுக்கு
பெயர் போர்வீரனும்,
கொள்ளப் பட்டவனுக்குப் பெயர்
தீவிரவாதியுமெனில்,
 
சொன்னவனை இனி
சிங்களனென உரைப்போம்!
———————————————

தாய்மை பூண்ட
பெண்களின் அடி வயிற்றில்
பற்றி எரியட்டும்;
முள்ளிவாய்க்காலின் இழப்பும்
ஈழக் கனவும் –
காரணம், ஆண்கள் விட்டதை
பெண்களாவது பிடிக்கட்டும்!
 ———————————————

காசு காசென்று
அயல் தேசங்களில் அலைந்ததில்
வாழ்க்கையை
வாழாவிட்டாலும்
இன பற்றும்
தேசப் பற்றினையும் கொண்டோம்;
ஈழத்தை மட்டுமே
கைவிட்டோம்!
———————————————

சுட்டு எரிந்ததொரு
காடு;
யாரும் –
ஈழமென எண்ணி
விடாதீர்கள்;
தமிழன் இனியும் 
தலைகுனிவதாய் இல்லை!
———————————————