வித்யாசாகரின் எழுத்துப் பயணம்..

1
உனக்கு நானென்றால்
எத்தனைப் பிடிக்குமோ தெரியாது,

எனக்கு நீயென்றால்
அதை எப்படிச்சொல்ல..

இதோ இந்த வானத்தைப்
பார்.,
அதோ எங்குமாய் நீண்டு விரிந்த
கடலைப்பார்.,
முடிந்தாலந்த நீலவானின் நட்சத்திரங்களை
மொத்தமாய் எண்ணிச் சொல்;

முடியாவிட்டால் நம்பிக்கொள்
அவைகளையெல்லாம்விட அதிகமானது
உன் மேலான எனதன்பு..
———————————————

2
உனக்கும்
எனக்கும்
தூரம் மனசளவுதான்;

உனக்குப் பிடித்த
எனக்குப் பிடித்த நம் மனசளவு!

உனக்கும்
எனக்கும்
அழகு ஒன்றுதான்;

உனை விரும்பும்
எனை விரும்பும்
நம் அன்பொன்றுதான் அழகு!

உனக்கும்
எனக்கும்
உயிர் ஒன்று தான்;

உனக்குள் துடிக்கும்
எனக்குள் துடிக்கும்
இந்தக் காற்றைப்போல நம்
உயிருமது ஒன்றுதான்..
———————————————

3
விடிகாலை வெளிச்சத்தில்
கத்தும் சிட்டுக் குருவியைப் போலத்தான் நானும்;

உனது சின்ன சிரிப்பைக்
கண்டாலும் எனக்கு
விடிந்துவிட்டதாய் எண்ணிக்கொள்கிறேன்..
———————————————

4
எங்கோ தூரத்தில் கேட்கும்
சிட்டுக்குருவியின் சப்தமும்,
எங்கோ தூரத்தில் கேட்கும்
சாவுமேளத்தின் சப்தத்தையும் போலத்தான் நீயும்

எங்கோ எனக்குள்ளே
ஒலித்துக்கொண்டே இருக்கிறாய்,

எனக்குள் நானாய்
நீயே உயிர்த்திருக்கிறாய்!!
———————————————

5
நீ வந்து நிற்பதை
தினமும் காண்கிறேன்,
தெருமுனை சென்று
திரும்பிப் பார்க்கிறாய்
காண்கிறேன்,
வெகுநேரம் காத்திருக்கிறாய்
காண்கிறேன்,
எதையோ எண்ணி உருகுகிறாய் காண்கிறேன்;
நீ செய்யும் எதையும்
எனக்காகவே செய்வதாக யெண்ணி
சுவாசிக்கிறது என் இதயம்..

ஒருவேளை
அந்தக் காத்திருப்பும்
தவிப்பும் எனக்கானதல்ல என்றறிவேனெனில் அதன்பின்
அந்த இதயம் சுவாசிக்குமா தெரியவில்லை..
———————————————
வித்யாசாகர்

1
மழையே
ஓ மழையே
ஒருமுறை சோவெனப் பெய்துவிடேன்..

மழைவானம் நீந்திப் பறக்கும்
பட்டாம்பூச்சிபோல
நானுமுன்னுள் ஒருநாள்
ஆழ்ந்துதான் போகிறேனே…
————————————————————

2
எனக்கென ஒரு சம்மதம்
தருவாயா ?

அடுத்த ஜென்மமென ஒன்று
உண்டெனில்
நீயெனக்கு மகளாய் பிறந்திடேன்,

உனைக் கொஞ்சி கொஞ்சியே யெனது
நரைகொட்டித் தீரட்டும்..
————————————————————

3
உன்னைக்கடந்து என்னால்
போகமுடிவதில்லை யென் மழைப்பெண்ணே..

இரவில் நீ
விளக்கணைத்துவிட்டுப் போய்விடுவாய்
ஆனால் உறங்கியிருக்கமாட்டாய்
என்பது தெரியும்,

நான் நீ வந்துநிற்குமந்த
சன்னலோரத்தையும் வாசல் கதவையும்
எடுத்துபோய்
எனது நினைவுவரை ஒளித்துவைத்திருப்பேன்,

நீயில்லா தனிமையைக்கொண்டு
இருட்டுமெனை கொள்ளத்துடிக்கும்..,

இருந்தாலும்
வெள்ளெந்தியாய் வாசலில் நின்று நான்
ஒரு கொசுவிடம் பேசிக் கொண்டிருப்பேன்
எனது மழைப்பெண்ணைப் பற்றி..
————————————————————

4
எங்கோ
கண்ணைக் கட்டிக்கொண்டு
நடக்கிறேன் நான்,

நீயோ
காதைப் பொத்திக்கொண்டு செல்கிறாய்..,

உனக்கு நானும் கேட்கவில்லை
எனக்கு நீயும் தெரியவில்லை

உள்ளே அக்கினியாய்
தகிக்கிறது அன்புத் தீ
வெறும் மனசாக மட்டுமே
இருவரும் ஒளிர்கிறோம்..
————————————————————

5

சிலவற்றை நான்
மிக பத்திரமாக வைத்திருக்கிறேன்,

நீ தொட்ட பொருளோ
அல்லது நீ பார்த்த பொருளோயெல்லாமில்லை

உனது பெயரின் சில
எழுத்துக்களது..
————————————————————
வித்யாசாகர்

கால்கள் உடைந்திடாத சக்கரம்
காலத்தோடு சுழல்கிறது
பிறகு ஊனத்தைப் பற்றி பயமெதற்கு ?

எல்லாம் மாறும்
காட்சிகளே பிறழ்கிறது; பின்
தோற்பதென்ன மூப்பதென்ன கேடு..?

வெற்றி உதிர்ந்திடாத மனங்களே
நம்பிக்கைக்கு சாட்சியெனச் சொல்லி
இன்னும் எத்தனை முகங்களில் அரிதாரம் பூச..?

வாழ்வது நிலைக்கலாம் நீளலாம்
சாவது ஒருமுறை யெனில்
தினம்தினம் செத்துப் பிழைப்பதேன்..?

வாழும்போதெல்லாம் வெற்றிக்கு ஏங்கி
கடைசிவரை தோல்விக்கே பயந்துத் தீர்வதைவிட
கொஞ்சம் வாழ்ந்துகொள் போதும்..

உறக்கத்தை சுமையாக்கி
பசியை பழகிக்கொள்
புகழ்ச்சியை பணத்தை கடந்துசெல்.,

பயமுட்களில்லா பாதையமை
சமூகத்தை அன்பொழுக நேசி
உன் வெற்றியை பிறர் வெற்றியாக்கு.,

இருப்பதை இயன்றவரைப் பகிர்ந்துகொள்
இல்லறத்தை உண்மையின் கண்ணாடியாக்கு
நானிலத்தையும் அறம்கொண்டு அள.,

கண்களை முயற்சி சிவக்க திற
மனதை நம்பிக்கை கனக்க மூடு
பயணத்தை உழைப்பால் மட்டுமே தொடர்.,

உலகில் எவரும் முழு தீயவரில்லை
நம்புமளவு எல்லோருமே நல்லோருமில்லை
பின் யாரிங்கே உயர்வும்? தாழ்வும்?

எதிர்மறை உடை; சமத்துவம் ஏந்து
எதிரும் புதிரும் ஒன்றென அறி
இயற்கையை உனக்குள்ளிருந்து வெளியே பார்; பார்க்க பழகு

ஒருமுறையேனும் மன்னித்துவிடு
ஒருமுறையேனும் கொடுத்து மகிழ்
ஒருமுறையேனும் அன்பு செய்..

பிறகு எட்டித்தான் பாரேன்
ஒரு கணம் நீ
சிகரத்தைத் தொட்டிருப்பாய்;

அல்லது
சிகரம் வெற்றிகளின் கூடாரமாயுனைத் தொட்டுக்கொள்ள
ஒரு தவமேனும் பூண்டிருக்கும்!!
————————————-
வித்யாசாகர்

1
ஒரு செடிக்கு அருகில்
நின்றுகொண்டு
அதில் பூக்கவிருக்கும் மலர்களைக் காண
காத்திருத்தல் எப்படிப்பட்ட ஒரு தவமோ
அப்படியெனக்கு,

உனை யொரு பொழுதில்
கண்டுவிடுவதும்..
————————————————————

2
அழகென்றால்
என்னவென்று நினைக்கிறாய் ?

இந்த உலகிலிருக்கும்
அத்தனைக் கண்ணாடிகளும்
அழகு தான்;

நீ பார்க்கையில் மட்டும்..
————————————————————

3
தினமும் உன்னிடம்
சாப்பிட்டாயா
தூங்கினாயா
வேலையா இருக்கியா
என்றெல்லாம் கேட்பதுண்டு;

அது நீ சாப்பிட்டதை
உறங்கியதைப் பற்றி அறிவதற்கல்ல,

உன்னிடம் நான் பேசியதாயும்
என்னிடம் நீ பேசியதாயும்
ஏதேனுமொரு கவிதைக்குள்
உனைப்பற்றி எழுதிவைக்க..
————————————————————

4
உனக்கொரு கோயில் கட்டவா
என்றுக் கேட்டால் நீ
சிரிப்பாய் தானே..?

ஆனால் உனக்கென கட்டிய
பல கோவில்கள்
மனதுள்ளே தினம் தினம் இடிந்துபோகிறது,

கோவிலில்லா விட்டாலென்ன
சாமியை தேடிப்பார் எனக்குள்ளே
எங்கும் நீயே நிறைந்திருப்பாய்..
————————————————————

5
ஏதேனுமொரு பறவைக்கு
தெரியுமா அந்த மொழி?
தெரிந்தால்
அதனிடமாவது சொல்லியனுப்பி விடுவேன்
உனக்கான நினைவையும்;

இந்த இரவின்
நீயில்லா கொடூர தனிமையைப் பற்றியும்..
————————————————————
வித்யாசாகர்