வித்யாசாகரின் எழுத்துப் பயணம்..

மதம் ஜாதி
ஏன் இனம் கூட
உன்னை தாண்டி பிறரையும்
வளர்க்குமெனில்
வைத்துக் கொள்;

அது உன்னையல்ல
பிறரை
பிறர் உணர்வை
பிறர் வாழ்வை ஒடுக்குமெனில்
உன்னையும் சேர்த்துக் கூட
கொன்று முடி

மதவாதம் ஜாதிவெறி இனவெறி அறு
மனிதம் நிலைக்கும் வரை மட்டுமே
அவைகளில் பற்று கொள்!!
—————————————

மதம்
தேவையென்று நான்
எழுதியதுண்டு,

அதனால் என் கைகளை
இப்போது
முறித்துக் கொள்ள
முடியவில்லை,

நான் சொன்ன தேவை;
மனிதனை
மனிதனாக வைத்திருக்கும் வரையில் மட்டும்,
அல்லது வைத்திருக்க மட்டும் –
மதங் கொள்ளும் வரை’க்கல்ல!
——————————————————————

ஜாதி
மதம்
இனம்
ஏழை
பணக்காரன்
தொழில்
பிடித்தல்
பிடிக்காதது என ஏதோ ஒரு புள்ளியில்
சந்தித்தும்
சார்ந்தும் கொள்கிறான் மனிதன்;

மனிதம் தோற்கும் காரணி
அங்கேயிருந்து முளைவிடுகிறது!
———————————————————-

காற்றுபுகும்
புகும் இடைவெளிக்குள்
புகுந்துவிடுவது போல்
புகுந்து விடுகிறது
எனக்கான சுயநலம்;

அறுத்தெறிய இயலாமையில்
வீட்டிலிருந்து
உறவிலிருந்து
நட்பு தாண்டி
தேசம் தாண்டி
கடவுள் வரை ஏற்பட்டது
விரிசல்!
————————————————–

ஏதேனும் ஒரு முகம்
நினைவுபடுத்தி விடுகிறது
உன்னை,

ஏதேனும் ஒரு முகம்
நினைவுபடுத்திவிடுகிறது
என்னையும்,

ஆழ சிந்தித்தலில்
எல்லோரும்
எங்கோ ஓரிடத்தில்
கலந்தே இருப்பதை உணரத் தான்
காலம்; மரணம் வரை நீள்கிறது!
—————————————————–