வித்யாசாகரின் எழுத்துப் பயணம்..

ஐம்பது சதவிகிதம்
தள்ளுபடி;

எல்லாமே வெளிநாட்டிலிருந்து
இறக்குமதி செய்த ஆடைகள்;

இரண்டு வாங்கினால்
ஒன்று இனாமாக தரப் படும்;

வேறெங்குமே
கிடைத்திடாத தரம்;

இப்படியெல்லாம் ஏமாற்றித் தான்
விலைபோகிறது –
ஏழைகளின் வியர்வையும் ரத்தமும்!!
————————————————————-

சந்து
பொந்துகளிலெல்லாம்
வீழ்கிறது
மனிதம்;

எந்த புள்ளியில்
பிறர்
மன்னிக்கப் படுகின்றனரோ
அந்த புள்ளியிலிருந்தே மனிதம்
வீழாதிருக்கலாம்;
வீழ்ந்தும் போகலாம்!
————————————–

வட்டிக்கு
பணம் வாங்கி

வட்டிக்கு
பணம் வாங்கி

உடைகிறது சேமிக்கும்
மனப்பான்மை;

இல்லாமலே போகிறது
மனசாட்சி!!
——————————

எங்கெங்கோ
யார் யாரோ
பேசிக் கொள்கிறார்கள் –
அவன் சரியில்லை
அது செய்தது
உலகமே அப்படித் தான் என்றெல்லாம்;

நான் இப்படித்தானென்று
ஒத்துக் கொள்ள –
யாருக்குமே துணிவில்லை!!
———————————————-

சுட்டெரிக்கும் சமுகத்தில்
சுயமாக –
எல்லோரும் சிந்திக்காதலில்
ஒவ்வொன்றாய் நிகழ்கிறது
கொலைகள்;

மதமென்றும்
ஜாதியென்றும்..

இனமென்றும்
பணமென்றும்..

உறவேண்டும்
காதலென்றும்..

கடவுளென்றும் கூட!!!
—————————————–