வித்யாசாகரின் எழுத்துப் பயணம்..

இரவு நெருப்பின்
இன்னொரு காதலன்; காதலி;
மனசு பெறாத தூக்கத்தை
மெத்தெனக் கொடுக்கும் தலையணை!

வருடத்து வாசனைகளை
மிச்சம் வைத்திருக்கும்;
வந்தவர் போனவரையெல்லாம்
நினைவில் முடிந்திருக்கும்;
புதிய உறை மாற்றினாலும் –
பழசு மறக்காத தலையணை!

ஐம்பதிலிருந்து ஆயிரம் வரை விற்கிறது;
ஆயிரங்களை கடந்து
பழைய கந்தைதுணியில் கனக்கிறது;
கனவும் தூக்கமும் வரவு என்பதால் – பணம்
தலையனையிடம் தோற்று இரவை வெளுக்கிறது!

எச்சிலில் நனைந்து; குறட்டை பாரம் சுமக்கிறது –
கண்ணீர் கதை கேட்டு கனவுகளை கொடுக்கிறது;
வெளியில் தெரியாத விசும்பலையெல்லாம்
யாரிடம் சொல்லவும் மறுக்கிறது;
கணவன் மனைவி சண்டையென்றால்
வலிக்காமல் அடிக்க கிடைக்கிறது!

அம்மாவின் புடவையோ – அப்பாவின்
பழைய லுங்கியோ உரையாகிவிடுகிறது;
இறந்து போன தாத்தா பாட்டியின் மிச்சச் துணிகள்
உள்ளே உயிர் பெற்றுக் கொள்கிறது;
வீட்டின் பழைய அடையாளப் பொருள்களில் ஒன்றாகி
தலையணையும் வாழ்கிறது!
———————————————————————————–
வித்யாசாகர்

நினைத்ததை செய்தும்
நேரத்தை விழுங்கும் போதை;
விஞ்ஞானம் பேசி அஞ்ஞானத்திலும்
ஆழ்த்தும் கண்டுபிடிப்பு; கணினி!

வளர்க்கவும் கெடுக்கவும் தெரிந்த
ஆசிரியன்;
மின் சக்தியில் உயிர் பெரும்
ஜடப்பொருள்;கணினி!

உலகம் பற்றி – ஒரு
சொடுக்கலில் காட்டும் வித்தகன்;
மனிதன் விதைத்ததில் – விலையும்
அறிவு ஜாலம்;கணினி!

சான்றிதழ் இன்றி
சர்வமும் கற்பிக்கும் கல்வியாலயம்;
சரித்திரம் பேசி, இலக்கியம் புனைய
மெத்தனமாய் போட்ட முதலீடு;கணினி!

நூறு பேர் வேலையை விழுங்கி
முதலாளிகளை வளர்த்த உத்தி;
மாத வருட வேலைகளை
ஒரு நாளில் முடிக்கும் தேச வளர்ச்சி;கணினி!

நாடு கடந்து வாழ்பவருக்கு
கடலை – தூரத்தை – வென்று
உறவுகளை வீட்டிற்குள் காட்டிய விந்தை;
தொலைபேசியில் சிறுக சிறுக தொலைத்ததை
ஒருநாளில் மொத்தமாய் வாங்கிய சந்தோஷம்;கணினி!

பட்டிதொட்டியெல்லாம்
பறந்து பரவிய அதிசயம்;
வீட்டுக்கு வீடு –
தொலைகாட்சியை விற்றாகவேணும்
வாங்கவேண்டிய அவசியம்;கணினி!

மொத்தத்தில், இருப்பவர் அனுபவிக்கும்
ஆதாயம்;
இல்லாதவன் இன்றும் ஏங்கி.. பயந்து.. பார்க்கும்
‘என்னவோ ஒரு டி.வி. மா(தி)ரி பெட்டி; கணினி!
———————————————————————–
வித்யாசாகர்