வித்யாசாகரின் எழுத்துப் பயணம்..

கனவில் நீ –
வருகிறாய்,

கனவிலிருந்து தொடரும்
உன்னையுமென்னையும்
பிரித்த சோகம்-
கனவுக்கு பின்னும் நீள்கிறது;

காலத்தின் கைகளில்
நீயும் நானும்
எப்பொழுதும் –
பிரிந்தே பிரிந்தே
கணவனும் மனைவியுமாக!!

நானிங்கு
சம்பாதிக்கும்
பணம் –

இரக்கமின்றி தின்கிறது
நம் –
சந்தோசங்களையும்
சிரிப்பையும்;

இருந்தும் –
உலகிற்கு நாம்
நலமென்றே தெரிகிறது!!

இங்கு நான்
கடக்கும் –
ஒவ்வொரு கணமும்

நீயில்லாத சொர்கத்தை
இழக்கும் –
ஒவ்வொரு –
துளிகள் என்பதை
யாரறிவார்!!

ஐயோ கடிதம்
அனுப்பக் கூட கையில்
பணமில்லையே – என நீ
அழுத அழையில்,

கடிதமில்லாமலே
புரிந்துவிட்டது – நீ

எழுதித் தீர்த்திடாத உன்
அத்தனை பாரங்களும்!

ஒரு சில
பொய்களில் ஜெயிக்கிறது
சிலரின் –
உண்மையற்ற வாழ்க்கை;

நானென் உண்மையை
உன் பொய்யற்ற அன்பில்
வெல்ல நினைக்கையில் –

உனக்கும் எனக்குமிடையே
குவைத்தும்
இந்தியாவுமாய்
எத்தனை பெரிய தூரம்!!