1
ஒரு விடிகாலையின்
கனவுபோல நீ,
எதிரிலிருக்கமாட்டாய்
நினைவில் நிறைய இருப்பாய்..

தண்ணீரிலலயும் முகம் போல
உனது நினைவும் இங்குமங்குமாய் அலைகிறது
ஆனால் கொஞ்சம் கூட
மறைவதில்லை..

அதெப்படி மறையும்
நானின்னும் இறக்கவேயில்லையே.. (?)!!
——————————————————

2
உனக்கான
எதுவுமே எனக்கு கனமில்லை

உன் பெயர்
சொல்லுமிடத்தில் துயரேயில்லை

உனக்காக என்று எண்ணிக்கொண்டால்
எனக்கு கடலில் நடக்கலாம்
நெருப்பில் படுக்கலாம்

வேண்டுமெனில் கத்தியெடுத்து
எனது மார்பில் குத்திப்ப்ப்பார்,
வழியும் ரத்தம்கூட போகுமென் உயிருக்காக
வருந்திவிடாது; ஆனால்

கண்டிப்பாக
உனை  பிரிவதையெண்ணி தவித்தேபோகும்..
——————————————————

3
நீரின்றி
அமையாது உலகு,
நீயின்றியும்
அமைவதில்லை நான்..

சப்தங்களால் ஆன
பிரபஞ்சமிவை;
உன்னால் மட்டுமே ஆன
பிஞ்சு இதயம் நான்,

இருட்டும் வெளிச்சமுமானவை
பொழுதுகள்;
நீயும் நீயும் மட்டுமேயானவன்  நான்!!
——————————————————

4
உனை நினைப்பதைவிட
ஒரு பெரிய
தவமில்லை,

உனை மிஞ்சிய அழகாய்
எவருமே எனக்குத் தெரிவதில்லை,

உனை ஆராதிப்பதைவிட
மனசு வேறெதையுமே
அத்தனை ஆராதிக்க விரும்புவதில்லை;

அப்படியென்ன
‘பெரிய இவளா நீ’ என்கின்றனர் சிலர்

ஆம்;
எனக்கு நீ எப்போதுமே
பெரிய அவள் தான்..
——————————————————

5
தூக்கிலிடும் தருணம்
இறந்துவிடுவோமென
தெரிந்தும்
அவன் கடைசியாய் இவ்வுலகை
காணும் தருணம் எத்தனை மகத்தானதோ (?)

அத்தனை கனத்தோடுதான்
பார்க்கிறேன் உனை
ஒவ்வொருமுறை விட்டுப் பிரிகையிலும்..
——————————————————
வித்யாசாகர்