Category Archives: ஞானமடா நீயெனக்கு

நீ தூங்கும் போது பாடும் – தாலாட்டில் எந்த ராகமும் இல்லை; நான் – அம்மா என்பதை தவிர!

நீ – என் செல்லமா அப்பா செல்லமா எல்லோரும் கேட்கிறார்கள்; நாங்கள் தான் உன் செல்லமென அவர்களுக்கெப்படித் தெரியும்!

நீ என் மடி மீது படுத்து பால் குடித்துக் கொண்டிருக்கிறாய்; நானுன் – மடியில் பிறக்கும் வரம் கேட்டு மீள்கிறேன்!

நீ சிரிக்கிறாயென நான் செய்ததையெல்லாம் வேறெந்த – பைத்தியக் காரனும் செய்திருக்கமாட்டான்; நிறைய – அப்பாக்கள் செய்திருக்கலாம்!

நான் ஒவ்வொரு பொருளையாக அடுக்கி வைத்துக் கொண்டே வருகிறேன்; என் குழந்தை ஒவ்வொன்றாக எடுத்து கீழே வீசிக் கொண்டே வருகிறது. என் குழந்தையின் யதார்த்தம் மீண்டும் அவைகளை நான் எடுத்து அடுக்கி வைத்ததில் களைந்து தான் போனது!!