Category Archives: கவிதைகள்

அண்ணன் தம்பி அம்மா அப்பா பிள்ளை மனைவி யாரையும் இழந்த எம் உறவுகள் – ஈழத்தை இழக்க மட்டும் தயாரில்லை!

சுவாசத்தில் சுதந்திரம் கேட்டு – வாழ்தலுக்கு ஒரு ஈழம் கேட்டுத் தானே இத்தனை போராட்டமென அறுபது வருடம் தாண்டியும் புரிந்துக் கொள்ள வில்லை உலகம்!

கைவீசி நடந்த அதே தெருவில் – கைகால் முடமாக்கப் பட்டு கிடக்கிறேன் – பரவாயில்லை; எக்காரணம் கொண்டும் எம் விடுதலை உணர்வை முடமாக்கிக் கொள்ளாதீர்கள் உறவுகளே!

நெல்மணிக்கும் தேயிலைக்கும் விவசாயம் பார்த்த தமிழனமே; வாருங்கள் ஊரெல்லாம் உறைந்துக் கிடக்கும் ரத்தத்தில் – எந்த உயிர் யாருடையதெனப் பார்ப்போம். ஒருவேளை அது – என்னுடையதாய் இருந்தால் மீண்டுமென்னை உயிர்பித்து விடுங்கள் ஈழம் வெல்லும் வரை மட்டும்!

உலக தமிழினங்களே வாருங்கள் – ஒரு வாரம் ஈழத்தில் தங்கி இறந்த போராளிகளின் உடம்பு கறி கிடைக்கும் தின்று – விடுதலை உணர்வை மீட்டுக் கொள்ளுங்கள்!