வித்யாசாகரின் எழுத்துப் பயணம்..

தெரு வுடைத்து
தார் பிரித்து
ஜல்லிகள் நிரப்பி
வேர்வையில் ஊறிப் போகும்
தொழிலாளிகளின்
கால் வெடிப்பும்,

வயிற்றுப் பசியும்,

தெருவோர தூசிகளில்
தூளிகட்டி –
கிழிந்த புடவியின் வழியே
அம்மா வருவாளா
தூக்கிக் கொள்வாளா எனப் பார்க்கும்
ஏக்கத்தின் தடங்களும்

தன் அடையாளங்களை
நல்ல தார்சாலையாக மட்டுமே
காட்டிக் கொண்டிருக்கின்றன!
————————————————————————

இட்லி கடை
வாசலில்
கைக்குழந்தையோடு ஒரு
பிச்சை காரி நிற்கிறாள்;

நான் கை கழுவிக் கொண்டு
அவளுக்கு ஒரு பொட்டலம்
கட்டச் சொன்னேன்,

‘நீ ஏய்யா பசியோட போற
இவளுங்க இப்படி தான், பொய்யி;
அது யார் பெத்த குழந்தையோ
இவ தூக்கிக்குனு அலையறா,
‘தா போ அங்குட்டு;

அந்த கடைக்கார தாய்
எனக்காக அவளை விரட்டினாள்,

அந்த கைக் குழந்தை
வீல் என்று கத்தியது..

‘குழந்தைகள் தான் பாவம்
இப்படி எங்கேனும் இருந்து
குழந்தை வாங்கி வருவது
நாம் சோறு போடவில்லை என்றாள்
குழந்தையை பிடித்துக் கிள்ளுவதாம்’

இப்பல்லாம் இப்படி
ஒரு கும்பலே அலைகிறதாம்,
பக்கத்து கடைக்காரர் வந்து
சொன்னார்.

யார் யார் எல்லாம் பொய்யோ
என் மெய் எனக்கு வலித்தது!
———————————————————————

கோவிலின் வெளி வாசலில்
வரிசையாய்
அமர்ந்திருக்கிறார்கள்

ஒவ்வொருவர் தட்டிலும்
சோம்பேறித்தனமும்
அதை மறைக்கும் கதைகளும்
நிரம்பிக் கிடந்தன;

வாழ்க்கையை தொலைத்தவர்களும்
தொலைப்பவர்களும்
ஒரு வேலை சோற்றிற்காய்
கை ஏந்தி அமர்ந்திருந்தார்கள்.

நன்றி மறந்த மானுடத்தால்
அவதியுறும் மனித தெய்வங்கள்
அப்பா அம்மா எனும் அன்பை
நினைவிலிருந்தே அகற்றி விட்டு
அரைகாசு கால் காசிற்குமாய்
வயோதிகம் கடந்து காத்திருந்தது;

போன பத்துபேரில்
ஒருவர் புதிது போல் கோவிலுக்கு
தர்மம் செய்வதாக எண்ணி
திரும்பி வந்து
ஒரு நாணயத்தை எடுத்து
கண்ணில் பட்ட ஒரு தட்டை பார்த்து எறிந்தார்,

தட்டில் விழுந்த
காசின் சப்தம்
எத்தனை பணம் என்பதை சொல்லவில்லை
அந்த சப்தம்;

சில்லறை என்பது மட்டும்
புரிந்தது அந்த
வரிசையில் அமர்ந்திருந்த ஒரு
குருட்டு அம்மா கிழவிக்கு!
—————————————————————————-

கோவிலில்
நிறைய உண்டியல்கள்
இருந்தது;

எதிலும் பணத்தை போட
விழையவில்லை நான்,

வெளியே வருகையில்
கிழிந்த கால்சட்டையும்
என்னை ஒழுகிய தலையுமான ஒரு
சிறுவனை அவசரமாக
பள்ளிக்கு அழைத்துக் கொண்டு போனார்
அவரின் தாய்.

அவரை அழைத்து
இதில் இவ்வளவு பணம் உள்ளது
குழந்தைக்கு நல்ல கால்சட்டை
எடுத்துக் கொள்ளுங்கள் என்று
கொடுத்தேன்;

கோவிலில் மணி அடிக்கும்
சப்தம் –
காதில் நிறைவாக கேட்டது!
———————————————————-