வித்யாசாகரின் எழுத்துப் பயணம்..

உழைக்கும் வர்கத்தின்
உடல் சுடும் நெருப்பு; வெயில்!
இலையுதிர்ந்த மரங்களின்
பசுமை பூப்பிக்கும் தகிப்பு; வெயில்!

எட்டித் தொட இயலா சூரிய முகத்தை
மண்ணில் பதிக்கும் பதைப்பு; வெயில்!
மனித குல முன்னேற்றத்திற்கு
வெளிச்சம் போர்த்திய எரிப்பு; வெயில்!

பூமி சூழ்ந்த கடலை
உறிஞ்சிக் குடிக்கும் உழைப்பு; வெயில்!
உப்பையும் மழையையும் மண்ணுக்குக் கொடுக்க
இயற்கை விடுத்த அழைப்பு; வெயில்!

அதிகாலை பொழுதின் மஞ்சள் பூசிய
அழகு வெயில்;
அந்தி சாயும் பொழுது வரை ஆட்டிப்படைக்கும்
ஏழ்மை ஜாதியின் கொடுமை வெயில்!

நேரம் அளக்கும் சூரியனின்
ஒற்றை முள் ஆதாரம் வெயில்;
மேல் ஜாதி காரனின் ஏ.சி. காரை
துளைக்க இயலாத வஞ்ச நெருப்பு; வெயில்!
————————————————-
வித்யாசாகர்

வெளிச்சத்தின் பிறப்பிடம்
இருட்டின் தாய் நிறம் – கருப்பு;
வண்ணங்களின் மூலாதாரம்
வாழ்வின் அஸ்தமனம் பேசும் – மொழி கருப்பு!

மூடதனம் தகர்க்க –
மூச்சு விட்ட புரட்சி நெருப்பு – கருப்பு;
சாஸ்திர சம்பிரதாய திநிப்புகளை
தகர்த்து எரித்த தீ நாக்கு – கருப்பு!

வெள்ளை போர்த்திய மனதின்
உள்ளிருக்கும் உண்மை கருப்பு;
மெல்ல மெல்ல நகர்ந்து – அமங்கள அர்த்தம் கொண்டுவிட்ட
மடத்தனம் கருப்பு!

முதிர்ச்சியின் மூல காவியம்
இனக் கிளர்ச்சிக்கு கரு சுமந்திட்ட –
ஆதி ஆதாரம் கருப்பு;

திருமண வைபவங்களில் ஒத்திவைக்கப் பட்ட –
கத்தி சுமக்காத நிறம் கருப்பு;

தெளிவு பிறக்காத புத்திக்கு –
கடைசி வரை கிடைக்கப் பெறாத ஞானம் கருப்பு;கருப்பு; கருப்பு!
—————————————————–
வித்யாசாகர்