வித்யாசாகரின் எழுத்துப் பயணம்..

சிங்கள ரத்த விழியில்
தமிழ் கனல் தகிக்க வந்தவனே;

எங்களின் மூடிய புத்தியை கிழித்து
இன ரத்தம் காட்ட வெந்தவனே;

வீட்டு –
தொலைகாட்சி சப்தத்தில்
அடைந்த காதுகளில் அறைந்து –
ஈழ – வெடி சப்தம் கேட்க, வைத்தவனே;

உலக எல்லைகோடு வரை
தமிழரை நாணப் பட வைத்து
சற்று ஈழம் காக்க சொன்னவனே;

எங்கோ விழும் பிணத்தை
எடுத்து –
பார்-இது-உன், உறவென காட்டிச் சென்றவனே;

இந்திய துரோகம் மறந்து
தூங்கிய இளைஞர்களை தட்டி எழுப்பி
வீரம் புகட்ட எரிந்தவனே –

இன்னும் கூட
நாங்கள் என்ன செய்தோம்?????

இன்னொரு முறை பிறந்து வந்து
மிச்சமுள்ளவர்களுக்காய் –
சற்று எரிந்துக் காட்டு;
அல்லது எரித்து செல் முத்துக் குமரா!!
—————————————–
வித்யாசாகர்

கல்லிடுக்கில் –
சொட்டும் ஈரமாகவே
நம்மில் எத்தனை பேர்; எத்தனை பேர்;

தேடி அலைந்தால்
யாரோ எங்கோ கிடைக்கிறார்கள்
உண்மையும் யதார்த்தமுமாய்;

பொய் சொல்லலாம்
தவறில்லை,
கொள்ளை அடிக்கலாம்
தவறில்லை,
கொடுமைகள் நிகழ்த்தலாம்
தவறில்லை,
பிறர் சொத்தை அபகரிக்கலாம்
தவறில்லை,
லஞ்சம் வாங்கலாம்
தவறில்லை,
கொலை செய்யலாம்
கற்பழிக்கலாம்
வஞ்சினம் கொண்டு ஊரையே அழிக்கலாம்
உழைத்த பணம் கொடுத்து
போதை வாங்கி –
மதி மயங்கி கிடக்கலாம்
தவறில்லை..
தவறில்லை..

ஒவ்வொருவருக்கு
ஏதோ ஒன்று தவரில்லாமலே
போகிறதே –
தவறில்லையா???

எது சரி எது தவறென
அளவுகோல் நிர்மாணிக்க கோரி தானே
எங்கேயோ நடக்கிறோம் நாமெல்லாம்…,

இப்படியா..
நகர்வது காலம்???

கடவுள் – புதைந்துள்ள மனம்
கல்லாய் இறுகிய –
கால இடைவெளியிலே தான்
தொலைத்தோமோ நம் நிம்மதியை;

காற்றும் மழையும் கூட
நம் பயணத்தை கொண்டே
தன்னை அமைத்துக் கொள்கிறதென
நம் எல்லோருக்குமே புரிவதில்லை தான்;

பூகம்பம் வந்தால்
சுனாமி வந்தால்
புயல் வெள்ளம் கரை புரண்டால்
வெயில் கருக்கி எடுத்தால்
கோபம் கொள்கிறோம் நாம்;

நம்மில் எத்தனை பேர்
நாம் சரியென்று
எத்தனை முறை –
நாம் சிந்தித்திருப்போம்???

ஓஹோ! மறந்து விட்டேன்
அதற்குத் தான் –
அளவுகோல் இன்னும்
அளவிடவில்லை இல்லையா…

சரிசரி..
சரியென்று நம்மை மெச்சிக் கொள்வோம்;
தவறில்லை என்பதற்காகவாவது
சிந்திப்போமே???
——————————————-
வித்யாசாகர்

நின் வாழ்வின் வளங்கள்
நலம் பெற வாழ்த்துக்கள்;

கோடி பூக்களின் வாசமாய்
நின் பெருமை கமழ வாழ்த்துக்கள்;

சங்ககவி சுவை போல
என்றும் மங்கா திறம் பெற வாழ்த்துக்கள்;

சந்திர சூரியர் போற்றும் காலம் வரை
நின் பெயர் –
வரலாறாய் வளம் கொள்ள வாழ்த்துக்கள்!

நீடு நெடுங்காலம்
நல் உடலும் பலமும் பெற வாழ்த்துக்கள்;

நீடூழி நலமாக
உன் நல்லாசையெல்லாம்
நிறைவேற வாழ்த்துக்கள்;

காலப் பொன்னேட்டில்
வெற்றியின் நாயகனாய் நீ
வளம் வர வாழ்த்துக்கள்;

ஆக, இப்படி எத்தனை
வாழ்த்தினாலும் மனதில் அன்பு குறையாத
இன்னும் வாழ்த்திக் கொண்டே இருக்கத் தூண்டும்
அன்புத் தம்பியாய் என்றுமிருக்க –
வாழ்த்துக்கள்.. வாழ்த்துக்கள்.. வாழ்த்துக்களுடன்..

அனைவரும் அன்பின் முத்தங்களோடு..

இதயத்தில்
நமக்கே தெரியாமல்
உயரம் தொட்டவர்;

தன் ஐக்கூக்களால்
அவ்வபொழுது
இதயம் சுட்டவர்;

வயதின் உயர்வை
மதிப்பாய் –
கட்டிக் காப்பவர்;

இளமையை சற்று
கூட்டி கூட்டி..
கவிநயம் புரிபவர்;

குடும்பம் போற்றும்
ஈகரை குடும்பமும் போற்றும்
உத்தமரானவர்;

நம் அக்காவால் கூட
ஐயா என்று மதிக்கத் தக்க
பேறு கொண்டவர்;

இனி..
வானம் தாண்டிய
புகழும்;
கால்பட்ட இடமெல்லாம்
சிறப்பும்;
நினைத்த நற்காரியங்களெல்லாம்
கைகூடியும்;
குறையொன்றுமில்லை மறைமூர்த்தி கண்ணா பாட
மனதார்ந்த வாழ்த்தினையும் சொல்லி;

நாமும் ஐயா க.ந.கலான் அவர்களின்
பிறந்த தின மகிழ்வை பகிர்ந்துக் கொள்வோம் தோழர்களே!

ஒரு வானவில்
அழகில் –

குழந்தை சிரிக்கும்
கொஞ்சும் சிரிப்பில் –

கட்டி அனைத்த நண்பனின்
இறுக்கத்தில் –

காதலி பேசும்
கடைக்கண் பார்வையில் –

அம்மா தலை சாய்த்துக் கொண்ட
மடியினின்பமென –

எங்கெங்கோ சுற்றி விளயாடுமின்பம்
தமிழில் ஒரு கவிதை
புனைந்ததாய் உணர்கையில்
வருவதே பேறு!

இனிய அன்பு வணக்கம் தோழர்களே!