வீடு வாசல்
விடுதலை எல்லாம் வேறு,
ரத்தவாடை மறக்கும் மனதுள்
சற்று தேசக்காற்று நிறையட்டுமே;

குண்டுபட்ட மார்புகளில்
வழிந்த ரத்தத்தின் ஒரு துளி
உன்னோடோ என்னோடோ நிற்குமெனில்
நம் மதிப்பை எண்ணிச் சிரிக்கட்டுமே;

ஏற்றும் கொடியின்
வண்ணத்தில்
எம் விடுதலையின் ஏக்கம் தெரியவொரு
சாத்தியநெருப்பு மூளட்டுமே;

சலசலக்கும் உணர்வுக்குள்
நரம்பு வெடிக்கும் ரணம் புகாத
பேத முட்டைகள் சாதியோடும்
மதத்தொடும் சாக்கடையுள் வீழட்டுமே;

மண்ணில் புதைந்த விதையேற்று
சந்ததி சேரும் கைகளுக்குள்
எல்லோருக்குமான விடுதலையே
நாளை ஏற்றயிறக்கமின்றி கிடைக்கட்டுமே;

நம் இனிவரும் நாளை சமைக்கையிலே
அங்கே எதிர்வரும் யாவர் விடுதலைக்கும்
எதிர்ப்பில்லா மனத்தை எவ்வுலகும்
எவர்க்குறித்தும் என்றெண்ணி ஏற்கட்டுமே;

பறக்கும் கொடி பரபரக்க
இனிக்கும் மிட்டாய் நெஞ்சினிக்க
சிரிக்கும் மனது மனிதத்தால் பூச்சொறிக்க
சமாதானம் சமாதனாமெங்கும்
சத்தியத்தோடு நிலவட்டுமே..

வாழ்வோருக்கு வாழ்த்தும்
விதைந்தோருக்கு வீரவணக்கமும்..
——————————————————————
வித்யாசாகர்