1
டாஸ்மாக்
புகையிலை
பான் குட்கா
வெண்சுருட்டு
நீதியற்ற கொலை
நிற்காத கொள்ளை
தீராத லஞ்சமென
இத்தனைக்கு மத்தியில் ஏற்றப்படும் கொடி
வீழ்ச்சியின் சாட்சி!!
——————————————————————

2
ஜாதிவெறி
மதச் சண்டை
நாத்திகம் ஆத்திகம்
மேலோர் கீழோர்
சுயநல அரசியல்
இணக்கமின்மை
…..
இல்லை இல்லை ..
இன்னுமிங்கே நான் மிருகங்களுக்கு
அடிமை தான்..
——————————————————————

3
எச்சில் துடைக்கும்
பொறுக்கும் கைகளில்
கொடி குத்தி விடாதீர்கள்
ஊசி மட்டுமே
குத்திக் கொண்டுள்ளது
நெடுங்காலமாய்..
——————————————————————

4
பசியாறட்டும்
பசியாறட்டும்
பணம் படைத்தோரே
இன்றைக்கு மட்டும் மிட்டாய் தந்துவிட்டு
நாளைக்கு பட்டினி எதற்கு?

அவர்களை விட்டு விடுங்கள்
அவர்கள் பசியாறட்டும்!!
——————————————————————

5
நான் மட்டும் சிரித்தால்
பைத்தியம் எனில்
எனக்கு மட்டும் கிடைக்கும்
வரமும் சாபம்தான்..,

இது குதர்க்கமில்லை..

சிந்தியுங்கள்
இன்றேனும்
எல்லோருக்குமாய் சிந்தியுங்கள்
நாளை பறக்கயிருக்கும் நமது தேசக்கொடி
எல்லோரின் மகிழ்ச்சியிலும் பளிச்சிடட்டும்..
——————————————————————
வித்யாசாகர்