வித்யாசாகரின் எழுத்துப் பயணம்..

ஏழு வண்ணத்தில் எண்ணிக் கோர்த்து
ஏழைகள் பார்வை உடுத்தும் – பட்டாடை;
வானவில்!

வளைந்த புருவத்தில் பூமிக் காதலிக்கு
வானம் காட்டும் வர்ண ஜாலம்;
வானவில்!

கல்வியறிவை கடன் வாங்காது
இயற்கை நெய்த கணினி வித்தை;
வானவில்!

ஏற்றத் தாழ்வுகளின் ஏணி மிதித்து
உலகின் பார்வைக்காய் பூட்டிவைத்த
வான தேவதையின் வண்ண மாலை;
வானவில்!

காற்றில் மழையில்
கரைந்திடாத கலைந்திடாத
மேகப் பூக்களின் விளம்பரப் பலகை;
வானவில்!

இயற்கையின் இயக்கத்திற்கு முகவரி கொடுத்த –
கடவுளின் பெயரெழுதிடாத மவுனத்தின்
வானம் தீட்டிய வண்ண மொழியாக்கம்;
வானவில்!

பூமிக்கு வரும் மழை விருந்தாளிக்கு
தன் மேக கழுத்தில் –
வானம் கட்டிய ஆபரணம்;
வானவில்!

திக்கிரண்டுமாய் நீண்டு வளைந்த
தென்றல் பெண்ணின் ஆடை அலங்காரம்;
வானவில்!

வானவில்லுக்காய்;
வார மாத தவம் போல் காத்திருந்து –
வெளிவராத மங்கை;
வானவில்!

என்றேனும் எட்டி வானம் பார்கையில்
அதிசயம் பூத்து போன – பூஞ்சரமாய்
சுட்டிக் காட்டும் விரல்நுனியில் – உதடு சுழித்து
முத்தமிட்ட வண்ணப் பெண்ணவள் வானவில்! வானவில்!
————————————————————
வித்யாசாகர்

நிறைய இதயங்கள்
இங்கு தான் உறைகின்றன;
உலகின் தூரங்களை ஒரு
சின்ன பொத்தான்களில் சுருக்கிவிடுகிறது
தொலைபேசி!

காதல் பேசியும்
அரசியல் தகவலறிவித்தும்
குடும்ப விவாதம் பகிர்ந்தும் வீட்டின்
ஐந்தாம் சுவராய் அவசியப்பட்டுப் போனது
தொலைபேசி!

கால வேகத்திற்கு
கையில் அடங்கி போயி;
உலக விஸ்த்தாரிப்பை
ஒரு சொடுக்கலில் அறிவித்து;
மொபைல் ஃபோனாகவும் பிறந்தாலும்
அலைபேசியென அர்த்தம் கொண்டுவிட்டதில் –
தொலைபேசிக்கே பெருமை!
————————————————
வித்யாசாகர்