வித்யாசாகரின் எழுத்துப் பயணம்..

கடல் –
பல காட்சிகளை விழுங்கிக் கொண்டு
கரை வரும் போதெல்லாம்
ஒரு குறிப்பெடுத்தே உள்புகுகின்றன;

கால் நனைத்த கடலின் உப்புவாசத்தில்
ஒருதுளியும் –
மர்மமாய் தனக்குள் வைத்துள்ள
மரணத்தின் எண்ணிக்கையை
யாரும் தட்டிக் கேட்டிடாத மமதை
கடலுக்கு இருப்பதேயில்லை;

தோண்டத் தோண்டக் கிடைக்கும்
வரலாறுகளை
விழுங்கியதன் தடங்களை மறைத்து
அலையலையாய்
அடித்துக் கொண்டிருக்கின்றன கடலின்
ஒவ்வொருக் கரையுமென்பதை
காதில்
சொல்லிச் சொல்லியேப் போகிறது
ஆணலையும் பெண்ணலையும்..

உணர்வின் வழியே நின்று
எதையோ உசுப்பும்
ரத்தமென
கடல்
மணலின் உள்புகுந்து மேல்நின்று
உலகத்தின் அழிவை யாருக்கும் காட்டாமலே
உப்போடு கரைத்தே வைத்திருக்கிறது;

மூழ்காத கடலின் நடுவில் நின்றும்
தன் அழிவை மறந்து
ஆடும் மனிதர்களை
கடல்
எப்படியோ
மன்னித்தும் விடுகிறது,

சிலநேரம்  கடலும் தன்
கோரப் பல் இளித்து
ஆணலையையும் பெண்ணலையையும்
தன் கரையொழிக்கும் தீயாக்கி
நல்லோர் பொல்லாரையெல்லாம்
நடுக் கடலிலாக்கிக் கொன்றேத் தொலைக்கிறது; உயிர்
தின்றேத் தீர்க்கிறது; குடிசையெனத் தெரிந்தும்
பெற்றக் குழந்தையோடும் கலைக்கிறது…

கால் கை நறுக்கி மனிதரின் வரலாற்றை
முடமாக்கியே அமர்கிறது!!
————————————————————————————
வித்யாசாகர்

மௌனம் உடையா பொழுதொன்று நிலவும்
முகமெல்லாம் ஒரு சோகம் படரும்
நகரும் நிமிடத்தில் மகிழ்ச்சி மின்னலாய் கீறிச்செல்லும்
அரிதான அன்பிற்கே நாட்கள் அத்தனையும் ஏங்கும்;

உடை கூட ஆசை களையும்
உண்ணும் உணவெல்லாம் கடமைக்காகும்
உறக்கமது உச்சி வானம் தேடும்
உறவுகளின் விசாரிப்பு காதில் எங்கோ என்றோ கேட்கும்;

பகலெல்லாம் பொழுது கணக்கும்
சட்டைப்பை சில்லறைத் தடவும்
முந்தானை ஓரத்தில் ஒரு கல்லேனும் முடியும்
படுக்க அன்றாடம் சுடுகாடே தேடும்;

காதில் தனது பிள்ளை பேசினால் இனிக்கும்
வார்த்தை தடுமாறி பேரனின் ஒன்றோயிரண்டோ கேட்கும்
போகும்வரும் வாசலில் கண்கள் யாருக்கோ காத்திருக்கும்
போகாத உயிரை விட்டுவிட்டுப் பிடித்துவைக்கும்;

வாழ்நாள் கனவுகள் வந்துவந்து மறையும்
வாழ்ந்த நாட்களை அசைப் போட்டுத் திரியும்
வந்த துணையின் பிரிவதை எண்ணி –
பழுத்த மனசது பாவம் கண்ணீராய் கரையும்;

காலத்தை மனதால் கணமும் நொந்தே; நொந்தே; சாகும்!!
————————————————————————————–
வித்யாசாகர்

திறக்காத கதவின்
மனத் தோன்றல்களாகவே
சப்தமிழந்துக் கிடக்கின்றன நம் முயற்சியும்
லட்சியங்களும் நம்பிக்கையும்..

வீழும் மனிதர்களின்
ஏழ்மை குறித்தோ அவர்களின்
பசி பற்றியோ
பிறர் நலமெண்ணி வாழாமையோ மட்டுமே
வீழ்த்துகிறது – நம்
சமூகம் தழைக்கச் செய்யும் மனிதத்தை;

தெருவில் கிடப்பவர்
யாரென்றாலும் விடுத்து
அவர் மனிதர் என்பதை மட்டுமேனும்
கருத்தில் கொண்டு அக்கறை வளர்த்தல்
நாம் இழக்கும் ஓர் –
உயர் உணர்வாகி வருகிறதே தவறில்லையா?

ஓடுடைத்து உலகைப்பார்க்கும்
பறவையின் பறக்கும் உயரம்வரை
காத்துக்கிடக்கிறது நமக்கான வெற்றியும்
வாழ்வின் வசந்தமும் என்பதை
இளைய சமதாயம் –
முற்றிலும் உணர்வதென்பது நம்
எதிர்காலக் கனவுகளின் பலமில்லையா??

சொடுக்கி முடிக்கும் அத்தனை
சாதனைகளையும்
சூழ்ச்சுமமுடைத்து
விரல்நுனியில் நிறுத்தும்
கொம்பன்களின் துணிவுக்கு
வாய்ப்பென்னும் வாசல் திறக்க
முயற்சியென்னும் சாவிகளெல்லாம் அதோ
வானில் குவிந்த நட்சத்திரங்களாய்
கைக்கெட்டியே கிடப்பதை அகல விரிந்த கண்களே
பார்த்தும் முயற்சித்தும் வென்றும் விடுகின்றன’ என்பதை
ஏன் நீயும் நானும் –
சரிசமமாய் உணர்வதில்லை???

வெளியில் காட்டாத திறன்
இறுகி இராத மனோதிடம்
எடுத்தாய்ந்துக்கொள்ள இயலாத் தெளிவு
இயல்பாய் இருந்திடாத உண்மை நிலை
எடுத்தாண்டிடா முயற்சி
இரும்பெனக் கொள்ளாத நம்பிக்கை
இருப்பதில் நகர்ந்து வெல்லும் உத்தி
அல்லது உறுதியென நீளும் –
பொத்தான்களில்லாத சட்டைதான் நம்மை
உலகின் பார்வையில் வெற்றியணியா நிர்வாண
மனிதர்களெனக் காட்டிவிடுகிறது..,

உயிரணையும் கடைசி தருணத்தில்
காற்றுமறைத்த கைகளென நம்பி
அந்த ஒவ்வொரு பொத்தான்களையும்
வாழ்வென்னும்
சட்டைக்கென
நம்பிக்கையோடு கட்டிவருவோம்;

மெல்ல மெல்ல நகர்ந்து நாளை
உச்சி ஏறி நிற்கையில்
வெற்றியோ அல்லது
அதை போதிப்பதற்கான அனுபவ அறிவோ
நம் உயிர்பையில் நிறைந்து
பெயருக்குப் பின் விழுந்துக் கிடக்கையில்
கண்ணடைக்குமந்த
கடைசிநாளில் –
வெளிச்சமான உலகில் கலக்கும்
அணையா ஜோதியாய்
சுடர்விட்டு எரியட்டும் நம் உயிர்விளக்கு,

விளக்குகளின் ஒளிவெண்மையில்
ஜொளிக்கட்டும் இப்போதைய கருத்த மனிதம்!!
———————————————–
வித்யாசாகர்

1
மிருகம் மனிதனைக் கொன்றது’ கொலை
மனிதன் மிருகத்தைக் கொன்றால்;
கடை!

2
மரங்களை வெட்டி
கூடுகள் கலைத்து கட்டப்பட்டது
ஒரேயொரு குடிசை!

3
பிணங்களென எரித்துவிட்டார்கள்
இத்தனை லட்சமென்று சொன்னார்கள்
என்னைச் சேர்க்காமல்!

4
காற்று நிறைய இருக்கிறது
தமிழர் வலியும், துரோகமும், அநீதியும்
சுவாசிப்பவர்களுக்கு வலிக்கவேயில்லை..

5
ஓட்டுப்போட்டு ஓட்டுப்போட்டு
தேர்ந்தெடுத்தோம்
லஞ்சம் வாங்கும் தலைவர்களை!

6
நிறைய பேர்
அரசியல்வாதியாகிறார்கள்
மனிதராக நிறைய அரசியல்வாதிகளில்லை!!

7
நிறைய பெண்களின் கழுத்தில்
இல்லாமலேயே அறுபடுகிறது தாலி
காதல்!

8
மனது வேறெங்கோ இருந்தாலும்
முத்தங்கள் தரப்படுகின்றன
கட்டாயத் திருமணம்!

9
ஜாதியும் கௌரவமும்
மிகப் பெரிதாகத் தெரிந்தன
மகள் இறக்கும் முன்|!

10
நான் காதலித்தபோது போராடினேன்
என் மகன் காதலித்தான் போராடினான்
ஜாதியை; மெல்லத் தின்கிறது காதல்!!

11
ஜாதிகள் இல்லையடி பாப்பா
என்று படிக்க –
ஜாதி கேட்டார்கள் பள்ளிக்கூடத்தில்!!

12
உடம்பெல்லாம் அறுத்துப் பார்த்தேன்
எங்குமேத் தெரியவில்லை
ஜாதி மதத்தின் நிறம்!

13
ஒரு பிரியாணியும்
ஒரு குவளைச் சாராயமும் போதுமாகிறது
ஒரு கொலைக்கு!!

14
வயிற்றுப் பசியில்
எரிகிறது
சமுகத்தின் போராட்ட நெருப்பு!

15
நூறு பெண்கள் நம் தெருவில் போனால்
அதில் கொஞ்சம் விதவை, கொஞ்சம் வாழாவெட்டி
கொஞ்சம் முதிர்கன்னி, நிறைய பேர் வாழாதவர்களே!!

16
பிச்சைக் கேட்கிறாயே
வெட்கமாயில்லை’ யென்றேன்
பைசா போடு வெட்கம் போகுமென்றாள்!

17
சின்ன சின்ன வார்த்தையில்
எரிகிறது பெருநெருப்பு
ஹைக்கூ!

18
பத்து மீன்களைக் கொன்று
குழம்பு வைத்தேன்
சட்டியில் கொலையின் நாற்றமேயில்லை!!

19
காசுக்கு எல்லாம் கிடைக்கிறதாம்
கொஞ்சம்
மனிதமும் கிடைத்தால் தேவலை!!

20
இந்தியில் பேசினால் இந்திக் காரன்’ சரி
ஆங்கிலம் பேசினால் ஆங்கிலேயன்’ சரி
தமிழும் ஹிந்தியும் ஆங்கிலமும் கலந்து பேசினால்?

தமிழரென்பார்களோ?!!!
————————————————————————
வித்யாசாகர்