வித்யாசாகரின் எழுத்துப் பயணம்..

நிறையப்பேரைப் போலவே
எனக்கும் அப்பாயில்லை..

அப்பா இல்லாத உலகம்
வெறும் இருட்டோடு மட்டுமே விடிகிறது..

அப்பாவோடு ஊர்சுற்றிய நாட்களை
விண்மீன்களோடு விளையாடிய நாட்களாக
வானத்துள்
புதைத்துக்கொண்டது வாழ்க்கை..

இறக்கை உடைவதற்குபதில்
பறப்பதை மறந்துவிட்ட
பறவைகளாகத் தான்
மனக்கண்ணிற்குள் பார்த்துக் கொள்கிறோம்
அப்பா இல்லாத எங்களை..

அப்பாவிற்கு வலிக்குமே என்று
காலழுத்தித் தூங்கியிராத இரவெல்லாம்
அப்பா போனப்பின்
நெஞ்சுக்குள் வலித்து வலித்து
நினைவாக மட்டுமே கனக்கிறது..

நீ ஓட்டு ராஜா’ நான் –
அப்பா இருக்கேன்னுச் சொல்லி
எனக்கு ஒரு மிதிவண்டி வாங்கித்தர
ஆறுமாத வேலைக்கு அன்றெல்லாம்
நடந்தே போனஅப்பாவை
எத்தனை விமானம் ஏறினாலும்
என்னால் மறக்கமுடிவதில்லை..

கருப்பு வெள்ளை படங்களோடுப் போன
சார்லிசாப்ளினைப் போலவே
வளர வளர
அப்பாவையும் மறக்கவேண்டுமென்றுத் தெரிந்திருந்தால்
அன்றே
கருவறைக்குள்கூட கலைந்துபோயிருப்பேன்..

பார்க்கையில்
ஒரு கண்ணைமூடிக்கொண்டுப் பார்ப்பதுபோல்
பார்க்கமுடிகிற
அப்பாயில்லாத உலகு
வெறுங்காலில் மிதிக்கும் முட்பாதையைக்கு ஈடென்று
எல்லோருக்கும் புரியாது..

அம்மாயெனும் வரத்தைப் போல
அப்பாயில்லாமலே வளர்ந்த
சாபத்தைப்பெற்ற பிறப்பும்
சபிக்கப்பட்ட பிறப்புதான்..

லுங்கிக்குள் மறைத்துத் தின்பண்டம்
கொண்டுவருவதும்,
படிக்க என்றால் பகலிரவு உழைப்பதும்
அடித்ததற்குக் கூட
அடுத்தகணம் அழுவதுமான அப்பாவை
எத்தனை இரவில் அழுது மறப்பது?

நான் போயிட்டேன்னா
நான் இல்லைன்னா
எனக்கு ஏதேனும் ஆனால் என்றெல்லாம்
சொல்கையில் பதறிய மனத்தைக்கூட
அப்பாவிற்குக் காட்டியதில்லை..

அப்பா போனதும்
அழுவோம் என்று அப்பாவிற்குத் தெரியும்
ஆனால்
அப்பா போனதும் அழுவோமே என்று நினைத்து
அப்பா எத்தனை அழுதிருப்பாரோ..

தெருவில் போகும் பிணத்தைக்கண்டு
நாலு தெரு தள்ளியடிக்கும் மேளத்திற்கு அஞ்சி
சாலையெல்லாம் வீசியப் பூக்களைப் பார்த்து
யாருக்கெல்லாம்
அப்பா அப்பான்னு மனசு அழுமோ..(?) தெரியவில்லை..

எனக்கு அழுகிறது..
———————————————————
வித்யாசாகர்

கள்ளச்சாராயம்

அறுபத்தினாலு பேர்
கள்ளச்சாராயம் குடித்து மரணம்;
அறுபத்தினாலு குடும்பங்களின்
அழுகைக்கு
தீர்வில்லா
நம் கொடூர மௌனம்..

எதற்கும் வருத்தமின்றி
திறந்திருக்கும் டாஸ்மாக்;
பலரின் கொள்ளிக்கு முன்பே
முதல் தீயிட்ட அரசு..

குடிக்க விற்றுவிட்டு
குடிப்பதைத் தடுக்கமுடியா அவலம்;
குடியினால் குடி முழுகும்
கண்ணீரில் நேரும் மரணம்..

புரியாத திட்டங்களும்
திட்டமில்லா வாழ்க்கையுமாய் நாம்;
நம் கண்முன்னே
நம்மால் அழியும் உலகு..
—————————————————————————

விபத்து

இங்கே ரயில் கவிழ்ந்தது
அங்கே பேருந்து இடித்துச் சிதறியது
நான்கு பேர் காயம்
ஆறு பேர் மரணம்

அச்சச்சோ!!
கண்களை மூடிக் கொள்கிறேன்
மனது பதறிக்கொண்டேயிருக்கிறது.,

முட்டாள்கள் என்றோ
பாவிகள் என்றோ
பாவம் என்றோ யாரைச் சொல்வது?

நாமெல்லோருமே
மாறாதவரை
மாற்றிச் சிந்திக்காதவரை
மரணங்களும் காயங்களும் தொடரும்..

ஒருநாள்
நம்மையும் அந்த பேருந்தோ
ரயிலோ
மரணமோ காயமோ தொடலாம்

தொடும்முன் யோசித்தால் அந்த
நான்கு பேரோ
ஆறு பேரோ
இனி காப்பாற்றப் படலாம்..
—————————————————————————

தகாத உறவு

கள்ளக்காதல்
அடுத்த வீட்டு மனைவி ஓட்டம்
கணவன் பிடிபட்டான்

அசிங்கமான நம்
அடையாளம்..

காதல் என்பது
அன்பென்று மட்டும் அறியப்படுகையில்
காமம் என்பது
அங்கங்கே
அதுவாக மட்டும் இருந்துக்கொள்ளும்..

உடம்பிற்கு
வாசனைதிரவியம் பூசிக்கொள்ளும் அறிவு
அதைச் சோற்றில்
போட்டுக்கொள்ளாத அறிவு
காதலையும் உரிய இடத்தில்
காட்டிக்கொள்ள வளர்தலே உயர்வு..

கண்ணியமும்
பண்பும்
உயர்ந்து நிற்கையில்
காதல் கரைபடுவதில்லை..

காதல் கசந்திடாத மனது
அதைக் கண்டவரிடத்தில்
காட்டிக்கொள்வதில்லை..

காதல் கொள்வது
மனதும் மனதும் கொள்வது
உடலும் உடலும் தொடுவதல்ல

விருப்பட்டவரிடத்திலெல்லாம்
கடைவிரிப்பதல்ல,
விரும்பியவரிடம் கண்களால் பேசி
உரியவரிடத்தில் மட்டும்
உயிரோடு பேசுகிறது காதல்..

விரும்புவதையெல்லாம்
அடைவது காதலல்ல
பேராசை

விரும்பினாலும்
அளவோடிருக்கும் அன்புதான்
காதல்..

காதல் பிசகல்ல
பிசகிக் காதலிப்பது பிசகு..
—————————————————————————

அரசியல்

அவர் கட்சி தாவினார்
இவர் விலகினார்
அவர் அவரிடம் சண்டை
இவர் அவருக்கு திடீரென ஆதரவு
மந்திரி வெளிநடப்பு
முதலமைச்சர் சொத்துக்குவிப்பு

யார் இவர்களெ ல்லாம்?

இவர்கள் யாராக
இருக்கவேண்டும்?

இவர்கள் யாராக இருந்தால்
இப்படியெல்லாம்
நடக்காது.. ?

நாம் யார்?

நமக்கு எது சரி?

நமக்கு யார் வேண்டும்?

நமது பொறுப்பு என்ன ?
நமது பலமென்ன ?

அரசியல்
நாமுண்ணும் சொறல்ல
நமை ஆளும் தீ..

வெளிச்சம் தருவதும்
வீட்டை எரிப்பதுமாய்
நிகழும் ஒன்று..

நாம் வாழுவதை
திசைமாற்றும் ஆயுதம்..

நம்மை யாராக ஆக்கவேண்டுமென
முடிவுசெய்ய
நாமாக்கிய இருக்கை; நம்மைத்
தூக்கிநிறுத்தும் இரு கை..

நாம் நேரே பயணிக்க
வழி தரும் நிலம்
நம் மண்ணின் பெருமை..

நாம் படிக்கவேண்டிய
அணுகக் கூடிய
ஆளத்தகுந்த திறன்..

வருபவருக்கு வழிவிட்டு
வழிநடத்தி
வெல்பவரை வாழ்த்தும் கம்பீரம்..

வெற்றி
தோல்வி
கருதாது
அலசி
பொதுநலன் பேணும் நடுநிலை..

நடுநிலையூரிய மண்ணிலிருந்து
முளைக்கலாம்
நமக்கான அந்த விதை..

அல்லது
இதுபோன்ற செய்திகள் விளைந்திடாத
நாளேட்டின் நிலை..
———————————————————————————-
வித்யாசாகர்

1
தெருவோரம் ஒதுங்கிநின்றேன்
மழையில்லை
செருப்பறுந்தக் காலில்
சுட்டது வெயில்;

செருப்பின்றி எதிரே
மீன்கூடைச் சுமந்துபோனாள் கிழவி
சுட்டது மனம்!
——————————————————————–

2
தாகத்திற்கு
பெப்சி வாங்கப்போனேன்
பசிக்கு
பிச்சைக் கேட்டு
நிற்கிறது ஒரு குழந்தை!!
——————————————————————–

3
புகைப்பிடிக்க இறங்கி
ஒரு கடையோரம் நின்றேன்

நிழலுக்கு ஒதுங்க
ஒரு நாய்க்குட்டி வந்து
என் காருக்கடியில் படுத்துக்கொண்டது..
——————————————————————–

4
மதியநேரம்
உச்சிவெயிலிலைக் கடிந்தபடி
உணவகத்துள் நுழைந்தேன்

வியர்வையுள் நனைந்தபடி
நெருப்பருகில் நின்று சமைத்துக்கொண்டிருந்தார்
அதே உச்சிவெயிலில்
ஒரு பெரியவர்!!
——————————————————————–

5
வீடுகளுக்கு
குளிரூட்டிக் கொண்டார்கள்
மனிதர்கள்..

மரங்களுக்கும்
பறவைகளுக்கும்
வெப்பத்தைக் கூட்டிக்கொண்டு..
——————————————————————–

6
நகரங்களில்
வெப்பம் பிரச்சனையில்லை
மின்சாரம்தான் பிரச்சனை

கிராமங்களில்
வெப்பமும் பிரச்சனை
மின்சாரமும் பிரச்சனை..
——————————————————————–

7
வெயில் பற்றி எழுதுவோருக்கு
நினைவிலேயே
இருப்பதில்லை
பெண்கள் நிற்கும் அடுப்படியும்
துணி காயவைக்கும் மொட்டைமாடியும்..
——————————————————————–

8
வாசலில்
வெய்யிலில் அமர்ந்திருக்கும்
பாட்டியைத் தாண்டிப்போய்
சந்தைக்குள்ளிருக்கும் கடையில்
வாழையிலையோ
பூவோ
காய்கறியோ வாங்கிப்போகும்
நமக்கெல்லாம்
பாட்டி பிழைத்தாலென்ன
பிழைக்காவிட்டால் தானென்ன..
——————————————————————–

9
அரை பெடல் அடித்து
மிதிவண்டி ஓட்டும்
சிறுவனுக்கு
வெயிலில் கடைக்கனுப்பிய
இரக்கமற்ற
பக்கத்துவீட்டு அத்தைக் கூட
சாமி தான்..
——————————————————————–

10
நாக்கு தொங்கத் தொங்க
வெயிலில்
மூச்சிரைக்க ஓடி
மரத்தடியில் நின்றது நாய்,
நாம் மரத்தை வெட்டினோம்

ஓடிப்போய்
சேற்றில் படுத்துக்கொண்டது நாய்
இழுத்து
கதவுகளை மூடினோம்

பசியில்
தாகத்தில்
வெயிலில்
சுற்றிச் சுற்றி வந்தது நாய்

அதைப்பற்றி
நமக்கென்ன கவலை, நாம்
சாப்பிட்டுவிட்டு
தூங்கச் சென்றுவிட்டோம்

மீண்டும்
வாசலில் வந்துநின்று
கத்தியது நாய்

ஒரு கல்லெறிந்து
வாசலில் விட்டதும்
ஓடியது ஓடியது மீண்டும்
வெட்டாத ஒரு மரம் தேடி

தேடி

ஓடிக்கொண்டே இருந்தது
அந்த நாய் ..
——————————————————————–
வித்யாசாகர்

1
வீடு பெருக்குகையில்
விளையாட்டுப் பொருட்களை யெல்லாம்
புலம்பிக்கொண்டே எடுத்து
அடுக்கினாள் அம்மா

விளையாட்டுப் பொருட்களை யெல்லாம்
புலம்பிக் கொண்டே
கலைத்துப்போட்டது குழந்தை..
——————————————————————–

2
விளையாட்டுப்
பொருட்களைப்போலவே
மனதிற்குள் அடுக்கிவைத்துக் கொள்கிறார்கள்
குழந்தைகள் நம்மை

இது அப்பா
இது அம்மாவென்று!
——————————————————————–

3
பள்ளிக்கூடம் முடிந்து
மணி அடித்ததும்
ய்யே…. என்றுக் கத்தினார்கள்
வீட்டிற்குப் போகும் குழந்தைகள்,

மறுநாள் வீட்டிலிருந்து
பள்ளிக்கூடம் வருகையில்
சோகமாய் நடந்து வந்தனர் பிள்ளைகள்,

ய்யே…. யெனக் கத்தியது பள்ளிக்கூடம்..
——————————————————————–

4
அவர்கள்
நினைத்துக் கொள்கிறார்கள்
அவன் தான் செல்லப்பிள்ளை
இவன்தான் செல்லப்பிள்ளை என்று,

அவர்களுக்கெப்படித் தெரியும்
இரண்டுப்பேருமே
பெற்றவர்களுக்கு
உயிரைவிட பெரியப் பிள்ளைகளென்று..
——————————————————————–

5
தந்தையும் மகனுமானாலென்ன
தந்தையும் மகளுமானாலென்ன
வயிறும் வாயும்
வேறு வேறுதானே என்கிறார்கள்

ஆம்; அதெல்லாம் வேறு வேறு தான்
ஆனாலெங்களுக்கு
உயிர் மட்டும் ஒன்றேயொன்று, அது
அவர்களுக்கான ஒன்று!
——————————————————————–

6
படிச்சியா
படிச்சியான்னு அடிக்கிறது
அந்தகாலம்,

படிக்கலைன்னா விடு
பார்த்துக்கலாம், அது
இந்தக் காலம்

எந்த காலமானலென்ன,

தந்தையர் எப்போதும்
அந்தந்த மகனிற்கான
அப்போதைய தந்தையாகவே இருக்கிறார்கள்..
——————————————————————–

7
உனக்குத் தெரியுமா
நீ புத்தகப்பை யை
சுமந்துச் செல்கையில்
உன் பின்னால் நின்று உனைப் பார்க்கும்
அம்மாவிற்கும்
அப்பாவிற்கும்
அந்தப் பையின்
கனம்கூட நெஞ்சில் கனக்குமென்று ?!!
——————————————————————–

8
தூங்கும்போது நான்
எனது –
குழந்தைகளின் முகத்தையேப் பார்க்கிறேன்

எனைப்போலவேதானே வாழ்க்கை
இவர்களுக்கும்
வலிக்குமென்று துடிக்கிறேன்..

கொஞ்சம் சிரிப்பாகவும்
கொஞ்சம் பயமாகவும் தெரியுமவர்களின்
முகத்தோடு
கத்தி நீட்டாமல் மிரட்டுமந்த
எதிர்காலத்தை
சற்று சபிக்கிறேன்..

கசக்கி பிசைந்து உருட்டி
நல்லதாக மாற்றியக் கனவுகளாக
மனக்கண்ணுள் வீசி
அவர்கள்மீது எரிகிறேன்..

போ; போய்
வெற்றியின் கனவுகளாக
அங்கே விரி..

கட்டளையின் நிம்மதியில்
உறங்கச் சம்மதிக்கிறது என் மனசும்..
——————————————————————–

9
என் பிள்ளை சிரிச்சா ஓரழகு
பேசினா ஓரழகு
நடந்தா ஓரழகு
ரெட்டை பின்னல் போட்டாலழகு
ஒற்றை வகிடு எடுத்தாலழகு

புட்டு என்றாலவனுக்கு
பாலினிக்கப் பிடிக்கும்,
உப்புமான்னா உயிரு

ஓவியமா; தங்கமா வரைவான்
பாட்டா; அருமையா பாடுவான்
மதிப்பெண்?
அதலாம் அவன்தான்
முதலிடம் வருவான்

இப்படி
எத்தனை எத்தனை
ஆசைவார்த்தையுள் வளரும்
இதே அறிவு –

வளர்ந்தப்பின் நாளை தனிவீடு தேடுமென்று
எந்தத் தாய்க்கும் தந்தைக்கும்
நம்ப கூட துணிவிருப்பதில்லை..
——————————————————————–

10
அப்பா இன்னைக்கு எங்க மேம்
என் கைல ஸ்டார் போட்டிருக்காங்க,

அப்பா நான் இன்னைக்கு
முதல் பரிசு வாங்கி இருக்கேன்,

அப்பா நான் மாநிலத்துலையே
முதல் மதிப்பெண் எடுத்துட்டேன்,

அப்பா எனக்கு பெரிய நிறுவனத்துல
வேலை கிடைச்சிடுச்சி.,

இப்படி சொல்லிச் சொல்லி
பூரிக்கவைத்த
அதே மகன்தான் –

இன்று
வயதாகி அமர்ந்திருக்குமிந்த
வாசலோரக் கிழவனை தாண்டிப் போய்
மனைவியிடம் சொல்கிறான்

உள்ளே வா சொல்றேன்..
——————————————————————–
வித்யாசாகர்