பூங்காற்றின் வாசத்தில்
என் பெயரெழுதி வைப்பதற்கு பதிலாக
உன் பெயரை பரிந்துரைக்கிறேன்;
நட்பின் வாசம் –
பூங்காற்றெங்கும் பரவட்டும்!!

இனிய அன்பு வணக்கம்!
———————————————————————–

வீழும் நட்சத்திரங்களாய் இன்றி
வாழும் நிலவினை போல் கொண்ட நட்பே..
நல் –
இரவு வணக்கம்!
———————————————————————–

மீட்டுமொரு வீணையின் இசையாய்
உள்ளே ஒரு பாடல் கேட்டுக் கொண்டே இருக்கிறது,
அந்த பாடலுக்கான யாரோ ஒருவரை
அந்த மனசு தேடிக் கொண்டே இருக்கிறது,

…தேடியவரை பெறாத நிம்மதியை
நட்பும் மிகையாய் தருகிறதென்று மகிழ்வோம்!

அன்பு வணக்கம்!
———————————————————————–

ஒவ்வொரு வணக்கத்திலும் கேட்கிறது
தமிழுக்கான இசையின் வாசனை;
தமிழுக்கான வாசனையில் மிளிர்கிறது
வணக்கமும்!
———————————————————————–

ஒரு மனக்குயிலின்
ஒயிலாக உள்ளே சப்தமெழுப்பி
நிற்கிறேன் ;
சப்தம் நட்பாய் நிறைகிறது
சப்தம் ஒரு வணக்கத்திற்குள்ளே
முடிகிறது!’

அன்பு வணக்கம்!
———————————————————————–

ஒரு நிலவு பூத்த
இரவின் நிசப்தத்தில்
எண்ணிடாத நட்சத்திரங்களாக கனக்கும்
மனதின் சுமையை
வணக்கம் சொல்லும் ஒரு தோழமையின் குரல்
உடைத்துத் தான் விடுகிறது;

அன்பு வணக்கம்!
———————————————————————–

உணர்வூட்டும் பொழுதுகளில்
எங்கேனும் கிடைத்து விடுகிறது
கவிதைக்கான கரு –
சிறு வணக்கத்தில் கூட!

அன்பு வணக்கம்!
———————————————————————–

சில
வார்த்தைகளை மட்டுமே
தேட அவசியமின்றி
அன்பிருந்தால் உடனே வந்துவிடுகின்றது
வணக்கமென்று!

அன்பு வணக்கம்!
———————————————————————–

வாழ்வின் வெற்றிடங்களை நிரப்ப
ஏதேனும் ஒரு உயிர்
எங்கேனும் ஓரிடத்தில்
நமக்குமாய் பிறந்துகொண்டுதானிருக்கிறது;
பிறருக்காக நாமிருக்கும் பட்சத்தில்!

அன்பு வணக்கம்!

———————————————————————–

எழுதுகோலின்
நுனிவரை வந்துவிடுகிறது
வார்த்தை-

எடுத்து வணக்கமாய்
சேர்த்ததில்
கவிதையானது…

இனிய காலைவணக்கம்!
———————————————————————–

ஊரெல்லாம்
இட்டுக் கொண்டிருக்கும்
கூச்சலுக்கு இடையேயும்
ஒரு கவிதை கேட்கும் இசை போல
தந்திரம் கொள்கிறது உன்
வணக்கத்தின் ஓசை;
ஒரு நான்குவரி கவிதைக்கேனும்!

அன்பு வணக்கம்!
———————————————————————–

முகங்கள் –
என்னவாக வேண்டுமாயினும்
இருக்கட்டும்,

உயிரை –
தமிழாகவே
வைத்திருப்போம்!!

அன்பு வணக்கம்!
———————————————————————–

ஒரு கதைசொல்லியாக வாழ்வதைவிட
நாம் வாழ்ந்ததை
ஏதேனும் ஒரு கதை சொல்லட்டும்.

என்றாலும், நம் கதைகளும்
யாரேனும் வாழ்வதற்கான
வழியை சொல்லலாம்;
அதற்குத் தக்க எழுதுவோமெனில்!
அன்பு வணக்கம்!
———————————————————————–

போவது உயிரென்று
தெரிந்தும்,

…விடுவது உயிரென்று
தெரிந்தும்,

உயிரை விட்டனர் தமிழர்
தமிழை விடவில்லை.

இருப்பினும்,
தமிழ் –
உயிர்கொள்ளவில்லை;

தமிழை –
தமிழரை கொள்வதாய் எண்ணி
தன்னைதான் கொண்று கொண்டிருக்கிறான்
சிங்களவன், என்பதை –
காலம் உணர்த்தும்.

காண –
நாமிருப்போமா யெனில்
கேள்வி தான்!!

அன்பு வணக்கம்!
———————————————————————–

ஒரு காதலியோடு போகும் போது மட்டும்
மிக சாதாரணமாக யாரிது என்று கேட்கும்
மக்கள் –
எப்படியோ; தங்கையோடு போகும் போது மட்டும்
யாரிது ‘காதலியா என்று கேட்க
…நா கூச மறுக்கிறது!

அன்பு வணக்கம்!
———————————————————————–

இதயம் இரும்பாலானது இல்லை எனினும்
நேரமும் இருபத்தியெட்டு மணிநேரமாக
இல்லையே தோழி –

எனவே இருக்கும் நேரத்தில் வணக்கம் சொல்லக் கூட
இருபத்தி நான்கு மணிநேரம்
குறையென்று எண்ணிய இடையில்
அன்பால் அதை கடந்து ஓடி வந்து
விடுகிறது மனசு; அன்பு வணக்கம் சொல்ல!

இனிய இரவு வணக்கம்
———————————————————————–

உணர்வெல்லாம் நிறைந்த
மொழியின் அழகை கைகளில் குவிப்போம்;
வாய் வணக்கமென்று சொல்லும்,

அதில் கலந்த அன்பு
மனதை வெளியே புன்னகையாய் காட்டும்;

புன்னகை வணக்கத்தில்
பூக்கட்டும் இந்நாள் உறவுகளே!!
———————————————————————–

கல் போல இறுகிய மனதிற்கு
அல்லது சதையாக பிணைந்த இதையத்திற்கு
தன்னை மனிதம் மிக்கதாக மாற்றிக் கொள்ள
பெரிதாக ஒன்றுமில்லை –
அன்பொன்றே தேவை படுகிறது;
அன்பு செய் உறவுகளே..

இனிய காலை வணக்கம்
———————————————————————–

இரவினை கவலம் கவலமாகவே விழுங்கும்
வலியான மனப்போக்கினை
இயல்பாய் வந்து மாற்றிவிடுகிறது
நட்ப்பின் ஒரு சின்ன வணக்கம்!
———————————————————————–

கோடிக்கு மேலான
நட்சத்திரங்களின் எண்ணிக்கையாக,

ஒற்றை நிலவின் ஒளியாக
உலகமாய் விரிந்த மனதாக
பெரிதாக எல்லாம் ஒன்றும் வேண்டாம்
ஒரு புன்னகைக்கும் அன்பு செய்; போதும்!
அன்பு வணக்கம்!

———————————————————————–

பள்ளிக் கூடத்தில் நட்பு பெற்று
நட்புகூடத்தில் பாடம் கற்று
பாடத்தில் வராத புத்தகத்தில்; மனம் புதைத்ததில்
முகங்கள் பல கிடைத்தன,
மனங்கள் பல இணைந்தன,
ஒன்றுக்கொன்று முகம் பாராமலே –

முகநூல் தெருவெல்லாம்
நட்பென்றே கொடி நாட்டின!!

அன்பு வணக்கம்!

———————————————————————–

உயிர்மீட்டும் வீணையின்
ஓரிழை நட்புமெனில் –

உடன்பிறக்காமலே உயிர்புகும்
உறவென்னும் இசைக்கு …
நட்பே உயிர்ப்பென்று கொள்க!

அன்பு வணக்கம்!
———————————————————————–

காதலின் காதலை பகிர்ந்தும்
காதலை கலக்காத நட்பில்,
அண்ணன் தங்கை ராக்கி கட்டாத
நட்பில் இறுகிய மனதில்;

சற்று அதிர்ந்து பேசியதற்கு கூட
பிறகுவருந்தி தோளனைத்துக்கொண்ட பண்பில்,
உதவிக்கு முன்னிலாவிட்டாலும்
ஆபத்தில் பின்னிற்க இயலாத நெருக்கத்தில்;

வாழ்வின் சுவரெல்லாம்
இதயத்தின் பலமாமாக பூசிய உறவில்,
உயிர் பதிக்கும் அன்பின்
நகரும் தெருவெலாம் நட்பு நட்பு நட்பென்றே –

உலகின் வெற்றி கோபுரம் மீதேறி
நமக்கான நம் பெயரெழுதி
நம்மை நண்பர்களாக மட்டுமே
பதிவு செய்வோம்……………….வா!!!!!!!!!

அனைத்து உயிர் சுமந்த நட்புறவிற்கும்

இனிய தோழமை தின வாழ்த்துக்களும் அன்பும்!!

அன்பு வணக்கம்!
———————————————————————–

ஏதோ ஒரு அலைவரிசையிலல்ல
அன்பென்னும் ஒரு வரிசையில் மட்டுமே
ஏங்கி நிற்கிறது நம்மை போல்
சில் இதயங்கள் –
வணக்கத்திலாவது நம் நினைப்பை பரிமாற்ற!

அன்பு வணக்கம்!
———————————————————————–

என்றோ பிரிந்த
ஏதோ ஒரு உறவின்
நெருக்கமாய் –
ஏங்கி திரியும் ஒரு மனதின் பிரதியாய்
நாமும் நம்மை
வணக்கத்தால் புதுப்பிப்போம்;

அன்பு வணக்கம்!
———————————————————————–

ஒவ்வொரு உயிர்களுக்கும்
இடையே ஏதோ ஒரு நெருக்கம்
இருக்கத்தான் செய்கிறது.

அது ஏதேனும் ஒரு அருகாமையில் தன்னை
அடையாளம் கண்டுகொள்கிறது.

அங்ஙனம் நமக்கு நெருக்கமானவர்களை
அடையாளப் படுத்த இணையம் ஒரு வரமென்று சொல்லி
வணக்கத்துடன்… நன்றிகளுமாய்….. நிறைகிறேன்..
———————————————————————–

இருட்டென்று நாம் உணர்கிறோமாயினும்,
சிறு வெளிச்சத்திலிருந்து வந்த
பெரு வெளிச்சக் காலையில் –

வாழ்வும் சிறு தவறுகளிலிருந்து விலகி
…பெரு நன்மையாய் அமையட்டும்
அனைத்து உயிர்களுக்கும் –

அன்பு வணக்கம்!
———————————————————————–

அன்பிற்கு ஏங்கும் மனசு தான்;
அன்பிற்காக பொறாமை கொள்ளும்.

பொறாமை எல்லோருக்கும் இருக்கும் உணர்வு
எல்லோரும் வெளியே காட்டிக் கொள்வதில்லை.

முயன்றவரை பொறாமையிலா தன்மை வேண்டும்
பொறாமை அறுத்தல் என்பது
நம் வெற்றிகளோடு நில்லாமல்
பிறரையும் வெற்றிக் கொள்ளவைக்கும்.

ஒருவேளை தான் தோற்றாலும்;
பிறரின் வெற்றியில் மகிழும்.

பொறாமை வளர்ப்பது;
சமூகம் எரிப்பதற்கு சமம்!

அன்பு வணக்கம்!
———————————————————————–

ஊரெல்லாம் சிரிப்பு சத்தம்…
அதில் உன் சிரிப்பு மட்டும்
எனை தொட்டதில்
சிரித்தது நீயுமென்றுணர்ந்தேன்;

அன்பு வணக்கம்!
———————————————————————–

வானத்திற்கு ஒரு கவிதையின் போர்வையிட்டு
உள்ளே மனிதத்திற்கான சப்தமெழுப்பி
அன்பெனும் மைகொண்டு
அகிலம் முழுதும் நம்மை
உறவென்று பதிந்து வைப்போம்; வா..
சகோதரா சகோதரி உறவு –

அன்பு வணக்கம்!
———————————————————————–

வானம் வசப்படாத பொழுதுகளில்
வசப்பட்ட அனுபவத்தின் கற்றை சிந்திப்பில்
மீண்டுமான முயற்சியில் விழித்துக் கொள்கிறது
கவிதை; வானம் கவிதைகளில் வசப்படுமென்று!

இனிய அன்பு வணக்கம்!
———————————————————————–

வேலைக்கு விடுமுறை
விடுமுறை இல்லாத நிறைய வேலைகள்
எழுத்தில் பொதிந்துள்ளதால்
என்றுமில்லை விடுமுறை;

எனினும் நலமோடு அன்பு வணக்கம்!
———————————————————————–

உலகின் எந்த புள்ளியில் இருந்தாலும்
நேரங்கள் மாறுகிறது
நம் அன்பு மாறுவதேயில்லை’ என்ற
ஒற்றை புள்ளியில் தமிழால் இணைந்தோம்;

இனிய மாலை வணக்கம்!

———————————————————————–

சிரிப்பில் கண்ணீரில் கோப கனலில் வெறுமையில்
தோல்வியில்
ஆற்றாமையில் உதிரும் நாளாக இன்றி
சிரிப்பில் மலரும் வாழ்க்கையாய்
துவங்கட்டும் இந்நாளும்; எல்லாம் உயிர்க்கும்!

அன்பு வணக்கம்!
———————————————————————–

சிரிப்பில்
கண்ணீரில்
கோப கனலில்
வெறுமையில்
தோல்வியில்
ஆற்றாமையில் உதிரும் நாளாக இன்றி
சிரிப்பில் மலரும் வாழ்க்கையாய்
துவங்கட்டும் இந்நாளும்; எல்லாம் உயிர்க்கும்!

அன்பு வணக்கம்
———————————————————————–

பூக்கும் மலருக்குப் பின் செடியும்
செடிக்குப் பின் வேரும் போல
இந்த கவிதைக்குப் பின் இருக்கும்
அன்பிற்கு வணக்கமும்!
———————————————————————–

உலக துயர் மறந்து;
தனக்கான கனவுகளோடு விடை கொள்வோம்;
நாளைய விடியலுக்காய்; உறங்கி விழிப்போம்!

இனிய இரவு வணக்கம்
———————————————————————–

கணினி கண்களை குருடாக்கியும் ஓயாத
எழுத்தார்வத்திற்கு இடையே வந்த கடமை
மறுக்க முடியா இடைவெளி என்பதால் –

இப்போதே வணக்கம் சொல்ல இயன்றது
இப்போதே காண முடிந்ததால்!

அன்பு வணக்கம் அனைத்து உறவுகளுக்கும்!
———————————————————————–

சிறு உளிகொண்டு
செதுக்கும் சிற்பம் போல்

அன்பெனும் பெரும் வேதத்தை
வார்த்தைகளென்னும் –
உளியும் செதுக்குகிறது;

அதிலொன்றை
அன்பு
வணக்கமென்றுக் கொள்வோம்!
———————————————————————–

உயிர்சொட்டும் உறவுகள்
வணக்கத்தில் நட்பூர
வெறும் வணக்கமென்று சொல்லாமல்
நட்பாகவே கரைகின்றேன்;

இனிய அன்பு வணக்கம்!
———————————————————————–

நேரம் கிடைக்கையில்
என் மனம் போர்த்தி கொள்கிறது
இந்த இணையம்..

தமிழாய்..
நட்பாய்..

கரைதலில்
மிட்சப் படாத நேரத்தில்
தொக்கி நிற்கிறது சில எழுதிப் பதிந்திடாத
கவிதைகளும் படைப்புக்களும்..

நேரம் அமைகையில் கண்டிப்பாக வருவேன்
அன்பு வணக்கம்!
———————————————————————–

முறியாத சோம்பலை உடைத்தெறிந்து விட்டு,
விண்ணை எட்டும் நம்பிக்கை பலமேற்றி,
சாதிக்கும் முயற்சிகளை பார்வையில் இருத்தி,
உலகவலம் வரும் ‘இணைய உறவுகளுக்கு

இனிய காலை வணக்கம்!
———————————————————————–

அன்பிற்கா பஞ்சம்;
அழைத்தால் பழகுவதிலே மனசு துஞ்சும்.

பேச பேச தமிழ் கொஞ்சும்,
இருப்பினும்; நேரம் கருதியே உடன்பட அஞ்சும்!!
தமிழாய் கவிதைகளாய்.. படைப்புக்களினூடே நிறைய பேசுவோம்

அன்பு வணக்கம்!
———————————————————————–

அன்பில் கலந்த தமிழ்;
ஆண்ட மொழியை ஆட்கொள்ளும் வேகம்.
உட்புகும் நெருப்பிற்கு கூட – சிரிப்பு
நிறம் போர்த்திவிட்டதில்; இனிக்கிறது போல்
எதற்கோ ஏங்கி எரியும் தணல்; தமிழென!

அன்பு வணக்கம்!
———————————————————————–

அன்பு; மொழியெனில்,
என் தாய்மொழி
அதுவென்று கொள்க!

அன்பு வணக்கம்!
———————————————————————–

அன்பின் இதயத்தால் கட்டுண்டு போவோம்
அன்பினால் மனிதம் நிலைக்க செய்வோம்
அன்பிற்காய் உலகை தமிழ் கொண்டு வெல்வோம்!

அன்பு வணக்கம்!
———————————————————————–

கேட்டார்க்கு
கேட்டதை கொடுப்போம்
முகநூலை உறவு
பாலமாய் அமைப்போம்
உறவில் அன்பை வளர்ப்போம்…
அன்பில்… …சகோதரத்துவம்
மலர்விப்போம்;

அந்த சகோதரத்துவத்தில்;
இங்கேனும் ஒற்றுமை
ஓங்கி
தமிழர்களாய் இணைவதில்;
ஒரு இனத்தின் பண்பை புதுப்பிப்போம்!

புதுமையில் பொலிந்த நம் பண்பிற்கு
உலகம் –
மீண்டும்
தமிழர்
என்றே பெயர் வைக்கட்டும்!!

அன்பு வணக்கம்!
———————————————————————–