Daily Archives: ஜூலை 29, 2010

வளர்ந்து நீ பெரியவனாகி என்னென்னவோ செய்ய வேண்டுமென்றெல்லாம் எனக்கு கனவுகளில்லை, நீ நன்றாக வளர்வாய் உனக்கு நான் பலமாக மட்டுமே இருப்பேன், கடைசி வரை நீயெனக்கு; இல்லையில்லை – நான் உனக்கு அப்பாவாக இருப்பதொன்றே போதும்! —————————————————-

ஸ்டேப்ளர் பின்னென்றாலே சிலருக்கு உடனே புரியும், அப்படியொரு சிறு கம்பி மதிய உணவிலிருந்து பல்லின் இடுக்கில் மாட்டி குத்தியது, உன் அம்மாவின் மேல் அப்படி ஒரு கோபமெனக்கு, சாப்பாட்டில் கம்பி இருந்ததால் அல்ல; அதை நீ; தின்றிருந்தால்?!! ———————————————–

உன்னை யார் கண்டாலும் எல்லோருக்கும் தான் பிடிக்கிறது; எல்லோரிடமும் கொடுத்துவிட்டு தனியாக நிற்பதில் நீ இல்லாத என் கைகள் இருக்கவே ஆசையில்லை எனக்கு! ———————————-

அலுவல் விட்டு இதர வேலைகள் விட்டு எல்லாம் விட்டு உனக்காக உன்னோடிருக்கும் கொஞ்ச நேரமே; எனக்கான நேரமென்று எனக்கொரு பூரிப்பு! ———————————-

உனக்கு பிடித்ததை மட்டுமே நான் வாங்க முயல்வேன்; உனக்குப் பிடிக்காதது என்று ஒதுக்கிய சிலதில் என் பெயரும் ஏனோ முன்னுக்கு வருகிறது, ஆம்; நிறைய வீடுகளில் நிறைய அப்பாக்களை நிறைய பிள்ளைகளுக்கு பிடிப்பதில்லை போல்; அடிக்காத அப்பாக்களை தவிர! —————————————————-