Monthly Archives: ஏப்ரல் 2010

ஓரிரு பருக்கைகள் தான் கீழே விழுகின்றன நீ எடுத்து வாயில் வைக்கையில் மிரட்டி – நீ கீழே போட்டதும் எடுத்து எங்கோ வீசுவேன். நீ நானென்னவோ நீ தின்பதை பறித்துக் கொண்டதாய் பார்ப்பாய். வேறென்ன, நான் கையில் வைத்திருக்கும் உனக்கான ஒரு தட்டு சோறு நான் தின்னாத மிச்சமென உனக்கு தெரியவா போகிறது!

உன் பிஞ்சு விரல்கள் பதிய எனை – கட்டிப் பிடித்துத் தூங்குகிறாய்; எடுத்துவிட்டால் எழுந்துவிடுவாயென எடுக்கவுமில்லை உறங்கவுமில்லை நீ தூங்கும்வரை விழித்திருக்கிறேன் நான்!

நீ தூங்கும் போது பாடும் – தாலாட்டில் எந்த ராகமும் இல்லை; நான் – அம்மா என்பதை தவிர!

நீ – என் செல்லமா அப்பா செல்லமா எல்லோரும் கேட்கிறார்கள்; நாங்கள் தான் உன் செல்லமென அவர்களுக்கெப்படித் தெரியும்!

நீ என் மடி மீது படுத்து பால் குடித்துக் கொண்டிருக்கிறாய்; நானுன் – மடியில் பிறக்கும் வரம் கேட்டு மீள்கிறேன்!